Kasaysayan ng Original Pinoy Music (OPM)

KASAYSAYAN…

Ayon sa Pinoy Wikipedia, katulad ng kabihasnan ng bansa, ang katutubong musika ng Pilipinas ay produkto ng kaniyang makulay na kasaysayan. Ang katutubong musika ng Pilipinas ay naimpluwensiyahan ng uri ng lahat ng kulturang nakaulayaw nito kaya naman hindi nakapagtatakang maging kasing-tunog ito ng mga musika sa Tsina o Indya, habang ito ay tunog Europeo. Tulad ng mga taong gumagawa at gumagamit rito, ang katutubong musika ng Pilipinas ay maaaring ituring na Kanluranin o di-Kanluranin, at bagamat mayroong mga iba pang pagkakahati sa bawat isang uri ay ipinakikita pa rin nito ang kabihasnan ng isang pangkat. Naimpluwensiyahan ng Musikang Kanluranin ang katutubong awit ng Pilipinas sa pamamagitan ng mga Kastila. Dahil na rin sumailalim ang Pilipinas sa pananakop ng mga Kastila sa loob ng mahigit 300 taon, hindi na nakapagtatakang makaririnig ang isang tao ng pagkakapareho sa katutubong Musika ng dalawang bansang ito. Ang ganitong uri ng musika ay kalimitang matatagpuan sa mga katutubong tinanggap ang paniniwalang Kristiyano sapagkat sila ang nagkaroon ng mas matagal na ugnayan sa mga Kastila kaysa sa mga di-Kristiyanong pangkat. Pinatotohanan rin ng mala-kanluraning musika ng Pilipinas ang pagsususri ni Dorothy Scarborough kung saan sinabi niyang: “Nagsisimula ang isang awitin bilang isang piraso ng musika, na nasa may-akda at kompositor ang papuri, na maaaring palitan katulad ng mga salita o musika, o pareho, sa pamamagitan ng mga mang-aawit na natuto at naidala sa pamamagitan ng bibig, na parang maging isang katutubong awitin. Ang katotohanan na kahit saan maaari itong malaman bilang inilimbag na musika na walang pagkakaiba… walang tunay na katutubong musika na may tumpak na kopya ng kahit anong bersyon kahit na ang kaparehong awitin. May sariling kahalagaan ang bawat bersyon o pagkakaiba nito." Sinasabi rin na ang katangian ng mala-kanluraning katutubong awit mula sa Pilipinas ang pagiging istropiko, kung saan iisa lamang ang ginagamit na melodiya sa lahat ng taludtod. Makikita itong mabuti sa mga Ballad, bagamat ang tinatawag na modified strophic, katulad ng awit na Irlandes na 'Red Is the Rose', ay mahirap matagpuan. Ang Anyong Dalawahan ay karaniwan ring ginagamit kung saan bagamat may iisang tono sa lahat ng mga taludtod ay mayroon namang refrain na iba ang tono. Ayon kay Boromeo na isang historian, “Ang isang-yunit na awitin ay binubuo ng mga bariralang musikal (dalawa o apat) kasama ang isang panloob na ugnayan na progresibo, bumabalik, umuulit o sumasalungat. Karaniwan ang dalawang-yunit o binaryo na anyo sa mga harana o kundiman. Inuulit ang bawat yunit katulad sa 'Lulay'. Binabago ang anyo sa tatlong inulit na disenyo o ternaryo sa pagbalik sa unang bahagi. Isang halimbawa ang bersyon ng 'Sarong Banggi'. Binanggit ang uri ng taludtod at refrain; i.e. 'Magtanim ay di Biro'. Isang pambihirang halimbawa ng namumunong-koro ang awitin ng para sa pagsagwan ng mga Ivatan, ang 'Un As Kayaluhen.”
Ang sinaunang musika sa kabuuan ay nagsasaad ng katangiang nagpapahiwatig ng mga saloobin, pangarap, at kahilingan ng mga katutubo. Mahalaga na maintindihan ang komunikasyon ay hindi lang nangyayari sa usapan kung hindi maaari rin sa pamamaraan ng pagkanta. Lumipas ang panahon, umunlad din ang musika sa Pilipinas habang ang Pilipinas ay nasa ilalim ng mga Amerikano. Unang pinakilala sa atin ng mga Amerikano ang rock n’ roll music noong 1898 hanggang 1946 na nagbigay daan sa pagsibol ng Pinoy Rock. Noong 1950s nag-umpisa ang unang Pinoy rock at ang sumunod na mga taon, nagbigay agad ng parangal sa Pilipinas ang Rocky Fellers, isang bandang puro Pilipino. Ang kanta nilang “Killer Joe” ay ang nagpasikat sakanila sa buong Amerika. Noong 1970s naman nagumpisa ang “Manila Sound”. Sumunod dito ang “folk music”. Ang pinakasikat na gumagawa ng “folk music” noon ay si Fredie Aguilar. Ang kanta niyang “Anak” ay sumikat sa buong Asya at Europa. Noong 1980s nag-umpisa naman ang “Punk-Rock” katulad ng mga bandang Betrayed, The Jerks, and Urban Bandits. Noong 1990s nauso ang “Pop-Rock” na kultura. Ang Eraserheads ang tinuturing na pinakasikat sa Pilipinas sa larangan ng musika. Sinabayan din ng Parokya ni Edgar, Rivermaya at iba pa ang pagtaguyod ng Pop-Rock sa Pilipinas. Sa sumunod na mga taon sumibol naman ang Hard rock at Heavy Metal ng mga bandang Wolfgang at Razorback. Hindi naglaon ay nag-umpisa din ang mga “Underground music” na limitado sa publiko dahil sa kakulangan sa kapital. Ngayon, tinutuloy ng mga banda ang sinimulan ng ating mga ninuno at nagsisilbing inspirasyon sa kaunlaran tulad ng mga bandang Pupil, Hale, Sponge Cola, Callalily, at marami pang iba.